周六(3日)凌晨世界盃G组，巴西提早取得出线权之下，领队迪迪大幅轮换阵容，以副选出战喀麦隆，老将丹尼尔担任正选，以39岁零210日成为「森巴兵团」史上喺世界盃最大年龄上阵球员，但呢位右闸做咗「黑脚」，巴西补时失守输0比1，几乎被瑞士抢走首名出线席位。
效力墨超球队普马斯嘅丹尼尔首2场分组赛都冇上阵，今仗唔止担正，仲戴上队长臂章，一举打破队友堤亚高施华上仗创出嘅纪录(38岁零67日)，成为巴西史上踢世界盃最老球员，而且有心有力，踢足全场。
丹尼尔自2006年10月首次为巴西上阵对厄瓜多尔以来，至今已为「森巴兵团」踢咗126场赛事，射入8球，今届世界盃可能系佢最後1次参加国际大赛。
至於今场比赛，巴西正选阵容作出9个变动，一班副选表现其实并唔差，加比尔马天尼利头顶脚踢，非常有威胁，费特洛迪古斯、洛迪高高斯亦有入波机会，但都把握唔到。踢到补时2分钟，喀麦隆打反击，由阿布巴卡顶入大门，令巴西今届首次失波兼输波。
当时瑞士领先紧塞尔维亚3比2，如果再入1球，就可以凭较多入波，反超前巴西，取得小组首名，届时巴西就要喺16强对劲旅葡萄牙，幸好瑞士最後维持赢3比2，巴西保住首名资格，16强对手只系南韩，主帅迪迪玩轮换几乎玩出事，真系被吓到一额汗。
