澳洲早前喺世盃D组以次名出线，相隔16年後再次杀入淘汰赛，全队上下以及当地国民同样相当开心，而队长马菲赖恩接受访问时，就唔小心自爆曾经睇过球迷喺当地大肆庆祝嘅片段，似乎打破咗领队格拉咸阿诺特（Graham Arnold），唔畀球员使用社交媒体嘅规距。
澳洲喺世盃D组最後一轮分组赛1球险胜丹麦，以小组次名成功晋级16强，唔少国民喺当地大肆庆祝，但格拉咸阿诺特赛後就讲明禁止球员庆祝，希望佢哋可以专注世盃：「今晚冇庆祝活动、冇得玩社交媒体，只系可以训觉，依样亦系我哋点解可以喺分组赛连赢两场嘅原因，我哋下场对阿根廷会继续表现出顽强斗志，但球员目前最重要喺恢复身体。」
不过一班澳洲球员似乎懒理主帅定下嘅规距，澳洲门将兼队长马菲赖恩接受传媒访问，就自爆曾经同队友齐齐违规：「老实讲我未有太多时间关注社交媒体，但有队友提及球迷喺墨尔本联邦广场嘅庆祝片段，我之後都有睇过好多类似镜头，好高兴见到咁多国民支持我哋，希望下场可以再创惊喜。」
