喀麦隆凭阿布巴卡补时入波，以1比0击败巴西，虽然都系出局，但毕竟把握最後1场打开胜利之门，场上仲出现「暖心」一幕，球证艾法夫向除衫庆祝入波嘅阿布巴卡出示黄牌，令呢位前锋两黄变一红被逐，但佢一啲都冇嬲，仲同艾法夫握手，对方亦报以微笑，祝贺佢入波帮喀麦隆胜出，可以话系史上最暖心红牌。
30岁嘅阿布巴卡首2场分组赛都系後备上阵，上仗入1球及1次助攻，协助球队逼和塞尔维亚3比3。佢今仗担正又入波，仲创出一项壮举，成为自2006年施丹之後，另1位单场世界盃有入波及攞红牌嘅球员，能够同法国球王睇齐，难怪佢「多谢」球证艾法夫成全，笑住离场。
