今晚世盃上演「死亡E组」最後一轮，亚洲代表日本硬撼欧洲劲旅西班牙，「东洋兵团」上仗输波後，陷入出局边缘，能否继爆冷赢德国之後，再踢出《足球小将》神剧情，创造另一次奇迹呢？另边厢4届冠军德国必须要赢哥斯达黎加，先有望出线，到底「日耳曼战车」会绝处逢生，定系连续两届分组赛肉酸出局？球迷拭目以待！
日本煞科战火并西班牙，佢哋上仗全失3分，出线形势急转直下，今场赢唔到分分钟出局，必定放手一搏。西班牙和波就够，冇必要同对手硬碰，预料又会以传控踢法玩「拉布」。日本跨届近6场世盃未试过输2球或以上，受让一球/球半可博下盘。（Now 618及616周五凌晨3时直播）
日本首仗爆冷反胜德国2比1，证明可以同一线劲旅抗衡，但领队森保一上仗对哥斯达黎加忽然玩轮换，原意系畀班主力休息，谂住和波都冇坏，结果事与愿违，以0比1输波，如果佢哋今场再输就宣告出局，背水一战下，随时踢番首仗对德国嘅顽强斗志。值得留意日本近两届世盃6场比赛，取得2胜1和3负，3场败仗都只系净输1球，今仗受让一球/球半，下盘有可取之处。
西班牙和波够出线
4分在手嘅西班牙拎多1分就够晋级，随时留有一手，以免踢残班主力。事实上佢哋首仗大炒到哥斯达黎加，只因对手不济，上仗对住状态一般嘅德国，领先下都被逼和，不宜高估。睇番佢哋上届世盃对另一亚洲球队伊朗，亦只能小胜1比0，今场让一球/球半风险大，捧番下盘为妙。
