世界盃B组最後一轮赛事，伊朗对美国备受全球关注，除咗关乎两队出线命运之外，亦因为两国政治关系长期处於紧张状态，令人担心届时会出现「事故」。长时间居住美国嘅德国名宿奇连士文火上加油，指伊朗上仗靠「胁迫」球证，先至赢波，令今场火药味更浓厚。
美伊曾於1998年世界盃分组赛碰头，当时双方先礼後兵，开波前伊朗球员向美国队送花，两队影大合照，以示友好，被指有意用「足球外交」为两国关系破冰，该场伊朗赢2比1，但最後两队都系分组赛出局。
相隔24年後，当时「足球外交」并未拉近美伊关系，近年更加剑拔弩张，特别系2020年1月美军以无人机击杀伊朗军头苏莱曼尼，令两国几乎开战，加上核问题及俄乌战争，伊朗被指向俄罗斯提供武器，都令美伊之间敌意愈来愈深，今场对赛已超出足球范畴。
大战紧张气氛下，曾於2011至16年执教美国队嘅奇连士文率先向伊朗发炮，指对方上仗不断向球证施压，先至赢到威尔斯：「伊朗补时入2球并非巧合，佢哋一贯擅长向球证、旁证、第4球旁证施压，仲有好多事情，我哋睇唔到，呢种系佢哋嘅文化同踢波方式。」伊朗主帅奎罗斯随即反驳，指责奇连士文诬蔑，佢嘅言论系足球之耻。
奇连士文长期喺美国生活及教过美国队，囝囝更曾入选过美国队，被指已变成「半个美国人」，梗系要出口术帮美国队。
