今届卡塔尔世盃有唔少新星备受关注，当中包括西班牙中场加维同埋德国中场穆斯亚拿，呢两位新生代中场近年一直畀人拎嚟比较，咁啱两人所属国家队同组，但踢完第一轮分组赛後，加维嘅数据完全赢晒，睇嚟穆斯亚拿之後要努力啲证明自己。
加维年仅18岁，效力西班牙班霸巴塞隆拿，亦系2022年欧洲金童奖同科帕奖得主，佢喺世盃首轮对哥斯达黎加嘅E组分组赛，贡献1个入球，成为世盃史上第3年轻入球球员，兼夺得全场最佳球员，带领西班牙大胜对手7比0，表现受到外界一致好评。
至於19岁嘅穆斯亚拿效力德国劲旅拜仁慕尼黑，同样被视为上年各大欧洲青年奖项嘅有力竞争者，但佢上场世盃对日本嘅比赛表现麻麻，仲错失咗唔少入球机会，间接令德国以1比2输波，赛後评分网站亦只系畀穆斯亚拿5.9分。
西班牙同德国将於下周一(28日)凌晨世界盃E组决斗，两位新星有机会正面交锋，到时就知边位先至系今届「新人王」。
