法国喺周日(27日)凌晨世界盃D组，以2比1击败丹麦，基利安麦巴比包办2个入球，呢位前锋以23岁零234日成为世界盃史上第2位累积入到7球嘅「U24」球员，同巴西球王比利睇齐，换言之只要「麦总」今届再入1球，就可以超越比利，相信机会非常大。
基利安麦巴比上届世界盃入4球，协助法国夺得冠军，佢今届表现更出色，连续2场入波，合共有3球进帐，除咗追平比利保持嘅世界盃24岁以下球员入波纪录之外，亦以31球追平法国球王施丹嘅国家队入波数字，并列法国队历史射手榜第7位，但「麦总」只系踢咗61场，效率非常高。
再对比其他球星，基利安麦巴比入球率更加惊人，佢第2度出战世界盃已累积入7球，两大球王美斯、C朗同样踢第5届，先至入到8球，以「麦总」嘅年龄同效率，将来应该有望打破世界盃历史射手王高路斯入16球嘅纪录。
