除咗K-pop同韩剧，南韩嘅综艺节目，同样深受国内同海外观众欢迎。除咗《Running Man》、《两天一夜》、《新西游记》同《我家的熊孩子》呢类由出名搞笑艺人、偶像或者歌手孭飞嘅综艺之外，近年有好多题材相对偏门嘅综艺真人骚，同样大受欢迎，收视高到你唔信。
好似由车太铉同赵寅成出演嘅《偶然成为社长》、由女舞者担纲嘅《Street Woman Fighter》，同讲述素人分手情侣重聚面对复合定展开新恋情嘅《换乘恋爱》，都杀出咗一条血路，唔系带旺节目所在地嘅经济，就系捧红咗出现嘅舞者或者素人。而为咗食正南韩出战2022年卡塔尔世界盃呢条水，SBS早喺年半前就推出一个叫做《???????》（译名：射门的女孩们）嘅足球真人骚，搵齐李荣杓、李天秀、金秉址、白智勳同曹宰榛一班前国家队成员参与，出任各支参赛球队嘅教练之外，喺组队方面都花咗好多心思同资源，务求吸引唔同层面同界别嘅人，关注个节目，关注足球！
《射门的女孩们》依家播紧第3季，参赛过嘅球队好多，包括由模特儿组成嘅「巨人队」、由演员组成嘅「行动主意者队」、由来自世界各地KOL组成嘅「世界级足球队」、由跨代女团成员组成嘅「顶级队」、由着名体育主播组成嘅「蟒蛇队」，同埋由历代南韩国家队球员嘅家人组成嘅「国家队家人队」。
可能因为李天秀老婆Shim Ha Eun带头响应嘅关系，其他「家人」都非常踊跃，而且个个大有来头，好似老爷系车范根嘅艺人韩彩雅、北韩国脚郑大世靓空姐老婆明瑞贤，同南韩国脚李浩歌手老婆杨恩智等等。咁现役南韩国脚嘅家人有无份？梗系有啦！3号门将赵贤佑嘅大学研究员老婆李熙英、中场李康仁个家姐李正根，同埋前锋黄喜灿个家姐黄熙正都系球员。其中司职中场嘅李正根，喺队中起动嘅作用，就同佢细佬一样，唔高大但胜在扭得射得，上季唔只带领「国家队家人队」夺得总冠军，自己仲攞咗分组赛嘅MVP。
《射门的女孩们》最新嘅一集犀利喇，由朴智星做领队，带住两位节目主持李寿根同裴星才，同埋几位球员去到葡萄牙，搵埋费高一齐分析吓今届世界盃南韩同葡萄牙嘅机会，当然仲有踢番场友谊赛。大家上网打 #??????? #??? 就可以搵到片睇。
