世盃E组首轮大战，4届冠军德国硬撼亚洲劲旅日本。德国近年喺国际大赛表现失色，上届世盃分组赛出局，上年欧国盃亦喺16强止步，费历克上任後提拔唔少新人，但稳定性明显下降，面对防守硬净嘅日本随时陷入苦战，上半场闷战居多，一於博半场和。（Now 618及616周三晚9时直播）
德国今届受到伤兵问题困扰，主力前锋迪姆华拿、进攻中场马高列奥斯都因伤冇份入选，前锋选到17岁嘅尤素法莫高高同20岁嘅卡廉艾迪耶美，中场主将穆斯亚拿亦只有19岁，佢哋喺国际大赛嘅演出仍系一大问号。反而由纽亚、鲁迪格、甘美治等领导嘅後场更有保证，分组赛首战或会采取稳阵踢法。
「蓝武士」防守韧力十足
日本多数主力都喺欧洲效力，当中包括浅野拓磨、镰田大地、吉田麻也、堂安律等8位喺德国搵食嘅球星，所以佢哋对欧陆式踢法非常熟悉，领队森保一嘅防守战术韧力十足，世盃外踢18场比赛只失过6球，今仗面对同组实力最强嘅德国，难免会先采取稳守战术。
「蓝武士」上半场踢法偏向保守，近5仗有4次开出半场和。德国喺飞卡塔尔参赛前，曾经约战另一亚洲球队阿曼，但球队表现全无霸气，最终只系喺尾段入波小胜1比0，德国嘅锋力未必可以轻易攻陷日本，博半场和好路。
