现今球坛，球星有时比领队更有权力及影响力，除咗大家熟悉嘅C朗之外，摩洛哥翼锋薛耶治亦系其中之一，由於佢同前国家队主帅夏利荷锡不和，一度宣布退出国家队，摩洛哥足总为咗令呢位车路士球星出战世界盃，不惜炒夏利荷锡，难怪球迷认为薛耶治先至系摩洛哥「真主帅」，现任领队列格拉基只系傀儡。
夏利荷锡曾经执教巴黎圣日耳门，科特迪瓦、日本国家队等球队，2019年接手摩洛哥帅位，呢位名帅治军严明，曾经公开批评薛耶治比赛态度差、扮伤，无心为国家队比赛，结果薛耶治一怒之下，今年2月宣布退出国家队。
不过，摩洛哥足总认为球队出战世界盃，唔可以冇咗薛耶治，今年8月炒咗率领球队打入决赛周嘅夏利荷锡，说服薛耶治回归，令人哗然。
现任主帅列格拉基年仅47岁，以往只执教过卡塔尔及摩洛哥球会，资历非常浅，难怪被指系傀儡，薛耶治先至系真正话事人。
摩洛哥足总为咗薛耶治而换帅，明显系一次赌博，至於赌赢亦或赌输，大家拭目以待。
