备受球迷爱戴嘅英格兰，周一(21日)晚喺卡塔尔世盃亮相大战伊朗，英国传媒赛前率先踢爆正选名单，据报领队修夫基将采用4-3-3主攻阵式，当中有9个系上年欧国盃决赛正选球员，包括中坚哈利马古尼。呢位曼联球星喺操练表现突出，左扭右扭兼出埋「施丹转身」，状态似乎相当理想。
英国《太阳报》爆料，修夫基今场会弃用3中坚踢法，排出4-3-3抢攻阵式，较受注目嘅系阿仙奴翼锋布卡约沙卡，将压倒曼城嘅菲尔科顿出任右翼，同哈利卡尼、史达宁组成前线三叉戟，中场就会由祖迪比宁咸代替刚伤愈嘅加云菲腊斯。除咗布卡约沙卡同祖迪比宁咸，其余9人都系上年欧国盃决赛嘅正选。
中坚位置喺世盃前出现争议，喺曼联沦为後备嘅哈利马古尼，过去1年表现受到球迷猛烈批评，但修夫基仍然对佢非常信任。不过近日网上疯传一段英格兰练波影片，哈利马古尼「踢到识飞」，片中佢接波後先做一个「施丹转身」，之後再左Cup右Cup搵位起脚，可惜射门被门将飞身扑出，呢段影片已有超过430万次观赏纪录，话唔定哈利马古尼着起英格兰波衫即翻生！
英格兰对伊朗预计正选阵容
比克福特
捷比亚?史东斯?哈利马古尼?劳基梳尔
祖迪比宁咸?迪格兰赖斯?美臣蒙特
布卡约沙卡?哈利卡尼?史达宁
