厄瓜多尔喺世盃揭幕战赢东道主2比0，迎来全球目光，安拿华伦西亚「起孖」，全队球员都开心到爆炸，仲好有默契地围埋一圈，双手指天，原来呢个举动背後有个感人故事。
球员入波兴奋，有特别庆祝都好常见，但全队围埋庆祝就甚少见，厄瓜多尔球员围埋一齐庆祝起初以为系同球员宗教信仰有关，原来佢哋想将入球献畀2013年因心脏停顿而去世嘅队友宾尼达斯（Christian Rogelio Benítez），希望可以同佢一齐分享喜悦。
司职中锋嘅宾尼达斯在厄瓜多尔联赛效力多年，曾於2009-10赛季短暂外借效力英超伯明翰，而佢2013年加盟卡塔尔嘅El-Jaish，在2013年7月29日系宾尼达斯效力新球会的第二日，佢因心脏骤停而去世，终年27岁。
宾尼达斯喺厄瓜多尔国家队嘅出场纪录永远停留在61场25球，而佢去世之後，比佢细3岁嘅安拿华伦西亚时隔一年半再度入选国家队，家阵喺国家队射手龙虎榜，以37球排首位，而宾尼达斯以25球排第4。
