C朗拿度早前接受皮尔斯摩根嘅爆炸性专访，表达对曼联上下嘅种种不满，而依名葡萄牙队长喺出席世盃赛前记者会个阵，就首次开腔回应，佢强调今次事件唔会影响到国家队，又希望记者唔好再问队友关於自己嘅嘢。
曼联球星C朗喺访问中称被球队背叛，又公开批评主帅坦哈格唔尊重自己，据悉球队方面将展开法律程序，寻求终止佢嘅合约。虽然事件引起牵然大波，但C朗直言一啲都唔後悔：「媒体写关於我嘅报道好容易，所以我唔使考虑其他人对我嘅想法，我想讲咩就讲。」
至於喺早前训练期间，C朗被指畀队友般奴费兰迪斯同祖奥简些路无视，佢亦有公开解释：「我同般奴关系好好，大家只系玩吓，因为架飞机延迟咗令佢迟到，我就取笑问佢系咪搭船；另外简些路喺训练中有啲唔开心，我只系捉住佢条颈作出安慰。」
葡萄牙正积极备战对加纳嘅H组首轮分组赛，力争首次捧盃嘅C朗表示队内气氛非常好，强调唔会受今次事件影响，大家首要目标都系专注赢波，希望记者唔好再骚扰一众队友：「当下一位球员嚟到记者会，大家唔使再问佢有关C朗问题，问关於世界盃嘅嘢就可以，成日提起我真系好烦。」
