卡塔尔世盃经已展开，西班牙国家队正积极备战，首场对哥斯达黎加嘅E组分组赛，不过据《阿斯报》报道，由於当地酒店冷气太冻，气温同户外嘅炎热天气相差太远，导致7名球员集体感冒，严重影响球队赛前部署。
虽然今届世界盃已经改喺冬季举行，但卡塔尔当地气温依然超过30度，而早前就有7名西班牙球员出现集体感冒，当中症状最严重嘅就系前锋艾华路莫拉达，除咗喉咙痛之外仲有肠胃炎；而《阿斯报》表示球员感冒原因，就系因为当地酒店冷气太冻，室内外气温相差太大导致球员唔适应。
除咗西班牙之外，唔少国家都同样面对球员出现感冒嘅问题，包括德国前锋富克洛、日本球员三笘薰等，睇嚟一班球员都仲要时间适应卡塔尔当地气候。
