力图衞冕世盃嘅法国队，喺决赛周展开前1日受到致命打击，「金球奖」前锋宾施马周六(19日)复操即再次受伤，经军医检查後证实大腿伤患严重，法国足总周日(20日)发声明宣布宾施马将缘尽今届世盃，领队迪甘斯表示对呢个结果「极度伤心」。
34岁嘅宾施马今季喺皇家马德里受到伤患困扰，11月份只系踢过26分钟比赛，周六系佢抵达卡塔尔後首课操练，但喺一次冲刺练习入面突然觉得大腿剧痛，MRI检查後发现肌肉有撕裂问题，将要缺席3个星期，最快要去到4强至决赛先有机会复出，法国足总就决定忍痛放弃。
法国领队迪甘斯表示：「我为宾施马感到极度伤心，佢一直以世界盃为最大目标，虽然依家受到咁大打击，但系我对法国团队仍然充满信心，我哋会尽最大努力去迎接面前任何挑战。」宾施马受伤後，佢嘅箭头位置预计会由另一老将基奥特顶上。
宾施马系2014年世盃法国队首席射手(3球)，但之後因为卷入勒索队友丑闻而被国家队放逐5年，直到上年先至获法国重召，而佢近几季亦登上足球生涯巅峰，上月更勇夺球员最高殊荣「金球奖」。今次系自丹麦名将西蒙逊(77年金球奖得主)缺席1978年世盃後，首次有应届金球奖得主冇份踢当届世盃。
宾施马事後喺社交网发文表示：「喺我嘅生活入面，从来冇试过放弃，但今日我必须为球队着想，正如我一直以来所做。理性话畀我知，我要将自己个位置，留畀一个可以帮助法国喺世盃取得成功嘅人，多谢大家嘅关心、祝福同支持。」
法国今届世盃身处D组，首场分组赛会喺周三(23日)凌晨对澳洲，同组仲有丹麦同突尼西亚，国际足协容许球队喺首场分组赛前更换大军名单，法国足总目前仍未决定会唔会补选球员代替宾施马嘅位置。
