巴西被视为今届世盃冠军热门，一众球员亦磨拳擦掌，不过王牌球星尼马似乎High过头，日前一课操练竟然向队友粗野铲波，踢中阿历士迪尼斯足踝，呢位由曼联外借西维尔嘅守将「中招」後表现痛苦，好在佢最後都冇乜大碍，可以恢复练习。
巴西大军集合後连日操练，周五(18日)练习期间尼马引球突破，被云尼斯奥斯祖利亚、阿历士迪尼斯等3人包夹，尼马被力逼下几乎甩波，但佢喺失平衡跌低嗰阵顺势出脚飞铲，结果踢中阿历士迪尼斯足踝，对方即时痛到跳起，要军医入场治疗，庆幸嘅系阿历士迪尼斯并冇受大伤，可以继续练习，周五(25日)凌晨首战塞尔维亚前会再做检查。
据报巴西老将丹尼尔事後都提醒尼马要保持冷静，有消息指39岁嘅丹尼尔入选，其中一个任务就系要「凑」好尼马，呢位巴黎圣日耳门前锋系巴西争霸嘅灵魂人物，佢嘅表现直接影响巴西捧盃机会。
