葡萄牙球星C朗拿度早前接受英国名嘴皮尔斯摩根专访，节目下集周四(17日)播出，焦点落喺C朗同曼联领队坦哈格身上。之前嘅专访精华入面，C朗表明「唔会尊重坦哈格」，今集就睇到C朗详细讲解两人「恩怨」，C朗直指自己受到坦哈格挑衅，但仍对自己行为感到後悔。
C朗被问到早前对热刺提早离开球场，呢位葡萄牙球星表示：「皮尔斯，我会老实同你讲，离开球场呢个行为我觉得後悔，但我当时感受到领队(坦哈格)嘅挑衅。佢话对曼城嗰阵唔换入我，系出於对我足球生涯嘅尊重，但就想我喺对热刺最後3分钟入场，完全唔合逻辑！」
C朗继续质疑坦哈格：「我认为佢系故意咁做(挑衅)，如果喺国家队或其他球队，教练想我喺最後5分钟落场帮手，我好乐意帮忙，但今次我感受到坦哈格嘅挑衅，唔单止系呢场波(对热刺)，而系喺之前已经出现。」
