距离世盃开锣仲有唔够3日，阿根廷开波前遇上大麻烦，足总周五(18日)宣布阵中2位前锋祖亚昆哥利亚同尼高拉斯干沙利斯，因伤无缘出战今届赛事，有传2人一直隐瞒自己受伤，令领队史卡朗尼非常愤怒，国家队被逼临时变阵，立即补选安祖哥利亚同泰亚高艾美达顶上；美斯想圆世盃冠军美梦，难度又再提升。
阿根廷喺周四(17日)唯一一场世盃前热身赛，作客5比0大胜阿联酋，祖亚昆哥利亚後备上阵有份入波，估唔到佢同尼高拉斯干沙利斯1日後就齐齐「世盃梦碎」。据报2位球星嘅伤患唔算严重，但史卡朗尼希望所有人都有100%状态，阿根廷媒体Albiceleste透露，2人为免自己位置受到动摇，所以隐瞒轻伤嘅事实，令史卡朗尼非常不满。
获补选嘅安祖哥利亚今季喺马德里体育会长居後备，而21岁嘅堤亚高艾美达就效力美职阿特兰大联，阿根廷嘅整体战斗力无疑受到削弱。更令人担心嘅系，阿根廷嚟紧仲有再变阵嘅危机，左闸马高斯阿古拿喺对阿联酋嘅热身赛受伤，将会进行检查睇下可唔可以继续留队出战世盃。
阿根廷喺世盃前受到伤兵困扰，保罗戴巴拿、迪马利亚、基斯甸罗美路入选前都因伤缺席一段长时间，前锋拿达路马天尼斯亦因肌肉伤患缺席对阿联酋嘅热身赛，中场卢施素就因伤落选26人大军名单。阿根廷首场分组赛系下周二(22日)对沙特阿拉伯，国际足协容许球队喺第1场分组赛前更换大军人选。
