卡塔尔世盃全城期待，除咗普罗球迷磨拳擦掌，准备为32支决赛周球队打气之外，香港马圈无论练马师、骑师及马主一样全情投入，迎接一场接一场嘅精彩大战，想知道几位马圈中人睇好边队成为世盃冠军？即刻去片！ 文：叶家亨
巴西荷兰星味爆灯
「靓虾女」马主刘津津：今届世盃我支持巴西同荷兰，我本身系曼联球迷，「红魔鬼」啱啱呢个暑假签入多位有质素「森巴兵」，例如安东尼马菲奥斯、卡斯米路，同埋曼联今年嘅新领队坦哈格系荷兰人，所以今届世盃会支持呢两支国家队，一向我都锺意同跟开巴西同荷兰，依家会更加支持！
骑师苏兆辉：我本身好锺意踢波，巴西有「足球王国」美誉，今年世盃当然要大力支持我祖家巴西。「森巴兵团」拥有两位数一数二嘅守门员，包括效力利物浦嘅艾利臣比加，同埋曼城门将艾达臣摩拉斯。我最锺意嘅巴西球星，就系曾经效力车路士同阿仙奴嘅大衞雷斯，佢射罚球好劲。虽然佢今年已经35岁，年纪唔细，冇份入选决赛周嘅最终名单，但巴西有唔少球员都喺英超搵食，好似效力阿仙奴嘅加比尔马天尼利、加比尔捷西斯，呢两位球员今季表现好好，我对佢哋有信心。
「自胜者强」马主陈国聪：
我本身比较锺意英格兰，原因系我比较集中睇英超赛事。至於世盃边一队捧盃，我就冇特别心水，简单用效力欧洲5大联赛嘅球员人数嚟统计，巴西最多，其次系英格兰，所以用呢个标准来定断，我个人睇好巴西。
英格兰可破锦标荒
「桃花」系马主曾祥显：我同好多香港人一样，最锺意英格兰，佢哋有好多具潜质嘅年轻球员，我个人最锺意英文名同我一样叫Harry嘅热刺射手哈利卡尼，因为佢喺英超入球数量连续多季都达到双位数字，希望英格兰今年喺哈利卡尼带领下，大踢争气波。
骑师希威森：我爸爸系英国人，所以我由细个到依家一直追捧英格兰，我自己亦都拥有英国护照。「三狮兵团」旧年喺欧洲国家盃表现出色，球员都搏晒老命，最後打入决赛，但互射12码输咗畀意大利，差啲就可以第一次捧盃，我希望佢哋今年世盃有好表现。
练马师罗富全：老实讲，我都有一段时间少咗留意足球，所以若然问我捧边一队，我都唔太清楚目前边个国家嘅足球实力最强。不过我以前系英格兰球迷，所以我都系希望「三狮兵团」可以有好成绩，但经常听闻英格兰成为大赛热门却倒灶，希望今届世盃会好啲。
法德葡见惯大场面
练马师高伯新：今届世盃相信会颇为精彩，法国贵为上届冠军，今年阵容依然强劲，队中唔少骨干成员都有大赛经验，始终有一定帮助。而队内前中後三线不乏人才，仍然系夺标热门。至於我祖家英格兰都有唔少球星助阵，但同时伤兵亦唔少，就睇吓佢哋发挥成点。
骑师霍宏声：我最锺意葡萄牙，原因好简单，因为佢哋有效力曼联嘅C朗拿度。虽然C朗今季喺曼联上阵机会唔多，但返到葡萄牙仍然系入球保证，呢届亦好大机会系佢最後一次代表葡萄牙踢世盃，锺意C朗嘅球迷千祈唔好错过。
练马师徐雨石：我一向系荷兰球迷，捧咗「橙衫兵团」队好多年，今次爱队能够再次打入世盃决赛周，当然要全力支持。不过，荷兰一向都冇「大赛运」，如果要我投注今届冠军，我都系较为睇好德国同法国队，毕竟两队大赛经验丰富，阵容亦相当强大，容易交出好成绩。
