挪威未能打入世盃决赛周，曼城锋霸艾宁夏兰特呢段时间冇比赛，只能斋操，来自英格兰第7级联赛嘅艾殊顿联谂到条绝桥，就系商借夏兰特28日，等佢喺世盃期间继续比赛，继续入波。
夏兰特今季状态大勇，为曼城上阵18场入23球，其中英超13场入18球，可惜嘅系佢所属嘅挪威未能打入世盃决赛周，呢段时间被逼休战，放个长假休息，极其量只能跟随挪威踢热身赛。
来自同地区嘅艾殊顿联忽发奇想，就系提出借用夏兰特，并已采取行动，该队官网发出公告：「会方将向曼城提供一份为期28日嘅短暂借用申请，令世盃期间夏兰特保持比赛，我哋已经联络曼城，不过对方暂时未有回覆，呢个并非恶作剧，我哋密切期待。」
艾殊顿联主帅克莱格指出：「呢个安排好合理，好过佢去打6个星期高尔夫球，我觉得夏兰特非常适合我哋球队嘅踢法，佢会好快融入。」不过艾殊顿联主场只可容纳4500人，如果夏兰特降临，首先要做嘅系增加容量。
