世界盃决赛周前最後一轮联赛，唔少球员都避重就轻，以免受伤影响参赛机会，不过瑞士中场格列沙加同英格兰中场占士麦迪臣，今轮都喺比赛早段退下火线，令球迷吓餐死，好在只系虚惊一场，唔会影响佢哋出战世界盃。
阿仙奴作客狼队一仗，开波唔够3分钟格列沙加就坐喺地下，要军医入场诊治，到16分钟更顶唔住提早离场，令人担心呢位瑞士国家队灵魂人物有严重伤患。不过阿仙奴领队阿迪达赛後表示：「格列沙加冇事，佢个肚好唔舒服所以要求换出，赛前用餐後我哋有几个球员不适，军医尽力帮佢哋舒缓，好在球队都适应得到。」
至於入选英格兰国家队嘅占士麦迪臣，喺作客韦斯咸一仗为李斯特城先开纪录後，25分钟就因为膝伤离场，佢赛後喺社交网留言派定心丸：「入波兼赢波系世盃前最好备战，我嘅伤势冇大碍，只系小问题，急不及待喺星期一(14日)同英格兰大军集合！」
