世盃前法甲好戏，巴黎圣日耳门(PSG)周日(13日)主场迎战欧塞尔。PSG今场诚意满分，世盃前照派强阵出击，美斯、尼马、基利安麦巴比，仲有其余多位世盃国脚全部上阵，结果凭麦巴比开纪录5比0大胜一仗。
PSG开赛11分钟由麦巴比开纪录，呢球波美斯都有份参与，佢攞波後交畀纽奴文迪斯阿历山大，再交助攻畀麦巴比搞掂，之後美斯再有入波机会，佢右边带波埋禁区起食胡左脚，但就炒高，半场领先1比0。
下半场PSG继续控制战局，卡路士苏拿接应纽奴文迪斯阿历山大传送，近门头槌建功，51分钟赢到2比0，6分钟後轮到卡路士苏拿送助攻，同样系世盃脚嘅阿舒拉夫建功成3比0，奠定胜局。
之後美斯未放软手脚继续攻，佢似乎想喺世盃前入番粒，可惜埋门射中柱，而佢亦唔再勉强，同尼马双双被换出场，为世盃做准备。
至於余下时间麦巴比继续比赛，但冇乜掂波，由连拿度辛捷士同艾基迪基各入1粒，埋单炒欧塞尔5蛋。
