世界盃仲有1个几星期就展开，唔少球星都担心会喺决赛周前受伤，不过英格兰王牌前锋哈利卡尼，周四(10日)凌晨英联盃第3圈竟然继续正选上阵，引嚟英格兰球迷猛烈批评，干地赛後亦承认哈利卡尼因「极度疲倦」而被换走，热刺助教史泰连尼更表明立场：「世界盃关热刺咩事？」
热刺喺英联盃作客吞诺定咸森林2蛋，领队干地虽然作出部份轮换，但就意外派哈利卡尼正选上阵，热刺今季各项赛事踢21场，呢位英格兰队长场场都系正选，令人担心佢喺世盃前被「搾乾」，但热刺助教史泰连尼赛前就回应：「哈利卡尼几时上阵系干地决定，我哋会照顾好球员，但世界盃唔喺我哋考虑范围，世界盃关热刺咩事？」
哈利卡尼今场踢59分钟被换出，干地澄清佢冇受伤，只系觉得非常疲倦：「哈利卡尼踢足每一场，觉得疲倦好正常，赛前操练佢已经要暂停嚟恢复体力，其他自私球员可能会话世盃就快开始，今场唔想落场，但哈利卡尼再次证明佢系个好人，我重申，球员觉得疲倦系好正常嘅事。」
