纽卡素今季异军突起，沙特阿拉伯主权基金上年10月入主，大肆增兵固然系「喜鹊」翱翔天际主因，但其实阵中表现最出色球员米基尔阿米朗，早於2019年1月已经加盟，呢位28岁巴拉圭国脚唔止好波，仲有段「逆袭人生」。
米基尔阿米朗出生於基层家庭，爸爸系保安员，妈妈喺超市工作，一家7口居住细小房屋，阿米朗18岁之前，仲同妈妈瞓同一张床，幸好有足球改变佢嘅人生。
有别於一般南美球员年轻时期就被欧洲球会发掘，米基尔阿米朗行咗条迂回之路，由巴拉圭球队波特诺加盟阿根廷球队拉鲁斯，跟住去美职，效力阿特兰大联。
美职有「球星养老院」之称，去得美职搵食，球员生涯基本上难以再上一层楼，甚至等收山。
不过，米基尔阿米朗竟然可以「逆袭」，凭超班表现，於2018年12月协助阿特兰大联夺得美职季後赛总冠军，其後被纽卡素以2,100万镑买入，成为「喜鹊」当时最贵收购。
米基尔阿米朗加盟纽卡素後，一直系球队主力，但过去表现一般，最威水只系2019/20年球季上阵42场入8球。不过，呢位技术出众嘅中场今季大爆发，踢14场已入8球，近7场英超入7球，认真犀利。
阿米朗加盟纽卡素初时，曾经话要创出一番成就，依家开始兑现诺言，好大机会协助取得英超前4位，参加下届欧联。
