世界盃决赛周仲有唔够2个星期展开，5届冠军巴西周一(7日)公布26人大军名单，由於「森巴兵团」人才济济竞争激烈，一众球星睇巴西足总直播嗰阵都七情上面，安东尼马菲奥斯、般奴古马雷斯等得悉入选後都同亲友激动拥抱。巴西今次名单有12人嚟自英超，包括曼联3大球星都齐齐上榜。
巴西领队迪迪今次点兵备受关注，尤其锋线上面粒粒皆星，佢亦一口气召入9名前锋出战决赛周，尼马、李察利尼、加比尔捷西斯等多年核心顺利入选，加比尔马天尼利、安东尼马菲奥斯等新星亦获得徵召，较令人意外嘅系利物浦前锋罗拔图法明奴落选，同菲腊比古天奴、加比尔马加希斯成为今次名单嘅「失意军人」。
对一众巴西国脚，今次世盃点兵有如考试放榜，唔少球星睇直播都劲紧张。李察利臣喺宣布嗰刻唔敢望，到听到自己个名先弹起身庆祝；纽卡素中场般奴古马雷斯就抱住BB，得悉入选後就癫咗咁大叫；安东尼马菲奥斯着住巴西波衫，同几位曼联朋友围圈跳舞庆祝；就连「入硬」嘅尼马，落实入围後都笑晒咁同朋友击掌，相当肉紧。
巴西26人大军当中，英超有12个球员入围成为最大户，当中曼联、皇家马德里同祖云达斯各有3名球员入选，喺巴西国内联赛效力嘅亦有3人，至於现年39岁嘅右闸丹尼尔，虽然今季转战墨超，但仍然获领队迪迪信任。巴西喺今届决赛周身处G组，同组有塞尔维亚、瑞士同埋喀麦隆。
巴西26人大军
●门将：艾利臣比加(利物浦)、艾达臣摩拉斯(曼城)、韦华顿(彭美拉斯)
●後衞：丹尼路雷斯(祖云达斯)、堤亚高施华(车路士)、马昆奴斯(巴黎圣日耳门)、基尔臣比尔马(祖云达斯)、丹尼尔(普马斯)、阿历士辛度(祖云达斯)、艾达米列达奥(皇家马德里)、阿历士迪尼斯(西维尔)
●中场：卡斯米路(曼联)、卢卡斯柏基达(韦斯咸)、费特(曼联)、艾华顿列比路(法林明高)、般奴古马雷斯(纽卡素)、法宾奴(利物浦)
●前锋：尼马(巴黎圣日耳门)、加比尔捷西斯(阿仙奴)、加比尔马天尼利(阿仙奴)、拉芬夏比洛尼(巴塞隆拿)、李察利臣(热刺)、云尼斯奥斯祖利亚(皇家马德里)、安东尼马菲奥斯(曼联)、洛迪高高斯(皇家马德里)、柏度古靴美(法林明高)
