曼联喺英超1比3不敌阿士东维拉，输波又输人，球星C朗踢正选兼担任队长，但未有发挥领袖角色之余，更加同对方中坚泰朗明斯「讲手」，两人喺1次争波之中，扭作一团互相拉扯，好似打紧MMA(综合格斗)，好彩球证手下留情，冇赶佢哋出场。
当时踢到60分钟，曼联进攻，泰朗明斯防守C朗，争持非常激烈，结果变成冲突，两人扭作一团，直至泰朗明斯倒地，网民抽水寸C朗胜出呢场格斗。球证睇完VAR後，双方只系各食1张黄牌，避过被赶出场，都算好彩。
C朗今仗踢足全场，3次射门只有1次中目标，冇入波又冇助攻，表现令人失望。曼联名宿兼C朗前队友里奥费迪南认为，C朗唔适合踢正选，建议主帅坦哈格用年轻球员。
除咗C朗之外，曼联中坚利辛度马天尼斯被影到2次向对手批肘，但都冇食红牌，遭网民怒插。赛後曼联领队坦哈格承认球队表现欠佳，冇做好应有防守工作。
