据英国《太阳报》报道，效力宾福特嘅前锋艾云东尼，因涉疑违规赌波被英格兰足总调查，不过消息指目前未有足够证据证明艾云东尼「犯罪」，预料无损佢为英格兰出战卡塔尔世界盃嘅机会。
26岁嘅艾云东尼有份入选英格兰对上一次大军，虽然最终并冇上阵，但仍被睇好可以入选世界盃26人大军，但临开波前突然卷入非法赌波丑闻，艾云东尼喺社交网简单回应：「我依家协助英格兰足总调查，喺未有结果前我唔会作出评论，我以身为英格兰人为荣，出战世界盃一直系我嘅梦想。」
据报艾云东尼被指控非法赌波嘅事件，系发生喺加盟宾菲特前嘅多年旧事，有消息人士透露，艾云东尼对今次调查感到担心，但佢坚持自己并冇做错任何事，而英格兰足总目前只系作出调查，并未有足够证据提出检控。
