利物浦今季表现大退倒，但领队高普仍然有奖攞，获当局颁发「利物浦荣誉市民」称号，赞扬佢执教红军7年以来嘅巨大贡献。
不过，高普却话唔知有呢项荣誉嘅存在，对於成为「利物浦荣誉市民」感到意外，唔少网民认为呢位德国名帅好可能教埋今季就走人，颁「利物浦荣誉市民」畀佢，实在讽刺。
高普获颁「利物浦荣誉市民」後话：「老实讲，当我收到消息时，都要用一分钟了解一下，到底发生咩事，当知道利物浦荣誉市民嘅意义後，我觉到好兴奋，不禁哗一声大叫，利物浦呢个地方同人对於我及家人都有特别意义，好荣幸成为呢度一分子。」
高普执教利物浦7年捧过欧联、英超等重要锦标，被认为系球队史上最佳主帅之一。不过，红军今季成绩欠佳，加上高普过往有「7年之痒」魔咒，教1支球队7年就会离开，难免令人怀疑佢喺红军嘅日子已经无多。
