曼联右闸达洛治今季表现大勇，奠定正选位置，但呢位23岁葡萄牙国脚将於明夏约满，英国传媒指达洛治嘅「金牌经理人」佐治文迪斯教唆佢唔好续约，等今季结束後转投巴塞隆拿。
据悉虽然曼联有权同达洛治续约1年，但佐治文迪斯仍然希望促成呢位「带刀侍衞」明夏转投巴塞隆拿。达洛治亦唔否认有离开曼联嘅可能性，佢话：「世界盃就快举行，我认为依家唔系倾续约嘅时候，我好开心帮到曼联，每次上阵都想交出好表现。」
达洛治助攻力强，9月欧国联射入2球，协助葡萄牙大胜捷克4比0，早前欧霸盃对舒列夫，亦有1球进帐，预料可以入选葡萄牙大军参加今届世界盃。
达洛治愈战愈勇，自然成为转会市场抢手货，网民认为可能系佐治文迪斯趁机「放风」，逼使曼联开出高薪合约畀达洛治。
除咗达洛治之外，前锋拉舒福特亦将於明夏约满，曼联要留住呢2位主力，恐怕需要大出血开出肥约。
