周一(31日)凌晨英超大战，曼联主场1比0小胜韦斯咸，焦点人物C朗解禁後继续正选上阵，不过今场主角就系另一前锋拉舒福特，呢位英格兰射手顶入全场唯一入球，亦系佢曼联生涯第100个入波，成为自2009年嘅朗尼之後，曼联近13年来首个「100球先生」。
曼联今场有C朗挂帅，出任左翼嘅拉舒福特表现非常活跃，比赛早段已经连番埋门，去到38分钟佢接应基斯甸艾历臣传中，以炮弹式头槌劲顶破网。曼联下半场仲有唔少机会，费特曾经头槌顶中门柱，尾段韦斯咸倾力反扑亦好有睇头，但迪基亚连环神救，帮曼联保住1比0胜果。
2015年喺曼联出道嘅拉舒福特，今场拎到佢球会生涯第100球，系曼联史上第22个「100球先生」，对上一个已经要数到2009年嘅朗尼，「福仔」赛後喺社交网表示：「为呢间特别嘅球会攻入100球！我7岁就为曼联效力，踢过每一个梯队、去过每一个球场，我想多谢所有职员、家人同队友，帮助我实现呢个里程碑。」
曼联近5场联赛3胜2和，今场赢波後以23分排第5位，比第4位嘅纽卡素少1分但踢少1场，杀入前4形势大好，领队坦哈格赛後表示：「我同球员讲佢哋仲要踢好啲，但士气、入球能力同进攻都好好，球队依家向住正确嘅方向前进。」
