过去1年表现备受批评嘅哈利马古尼，周一(31日)凌晨再次为曼联正选上阵，系佢2个半月以来首次喺英超担正，虽然久疏战阵嘅佢早段表现紧张，但之後愈踢愈好，面对韦斯咸尾段狂轰猛炸都顶得住，全场录得8次解围、3次封阻射门，表现相当精彩。
哈利马古尼对上一次喺英超踢正选，已经系8月13日0比4输畀宾福特，之後被贬後备仲要受埋伤，今场乘华拉尼养伤重夺正选，成功保住不失球，领队坦哈格赛後亦大赞：「马古尼保护禁区踢得非常精彩，佢系个伟大球员，更加系个出色後衞，我哋睇到佢对球队有几重要，我为球队保持不失感到开心，特别系为马古尼开心。」
哈利马古尼回勇，最开心莫过於英格兰领队修夫基，呢位29岁中坚一直系修夫基心腹爱将，但佢喺曼联坐冷板，就令弃用佢嘅声音不断扩大，依家哈利马古尼大踢争气波，英格兰世界盃大军可以预埋佢啦！
