阿仙奴周日(30日)晚英超，凭後备入替嘅雷斯尼尔逊梅开二度，带领球队以5比0大胜榜尾嘅诺定咸森林，全取3分後重新压过曼城上番榜首，不过今场胜仗美足不足嘅系，布卡约沙卡受伤，上半场就要调走，或多或少影响球队部署。
今场「兵工厂」阵容无乜大改变，加比尔捷西斯同布卡约沙卡、加比尔马天尼利挂帅，中场由马田奥迪加特及格列沙加领军，後防有富安健洋及宾韦特，今场兰斯达尔亦系英超第50场上阵。
一如所料阿仙奴轻易控制战局，并且5分钟就已经入波，「沙卡仔」右路左脚斩波入禁区，加比尔马天尼利抢点成功，头槌攻门破网，为「兵工厂」打开纪录。马天尼利入波後，攞起柏保路马尼嘅波衫，为呢名喺意大利米兰被刀伤嘅阿仙奴借将打气。不过助攻嘅布卡约沙卡之後受伤，23分钟要由雷斯尼尔逊入替，阿仙奴就保持1比0战果返入更衣室。
下半场开波阿仙奴又闪击得手，雷斯尼尔逊3分钟内连入2球，先喺49分钟禁区内接应加比尔捷西斯传波，扭过一名诺定咸森林球员施射，虽然被门将挡出，但佢再被多一脚搞掂，跟住尼尔逊再喺52分钟入多球。
赢紧3粒嘅阿仙奴得势不饶人，汤马士柏迪5分钟後远射得手，帮球队领先到4比0。森林毫无还击之力，马田奥迪加特78分钟射到5比0，完成呢场大胜。
