曼联喺欧霸盃大胜舒列夫3比0，翼锋安东尼马菲奥斯虽然冇波入，但仍然成为焦点人物，因为呢位22岁巴西国脚喺比赛期间，无厘头玩原地转，虽然冇对赛果造成影响，但令人质疑佢态度唔认真，曼联名宿史高斯更直斥安东尼马菲奥斯系小丑。
当时安东尼马菲奥斯喺右路攞到波，原地转两个圈之後，再传出去，动作非常奇怪兼无谓，可能对手都估唔到佢有此一着，并冇上前抢逼，否则随时铸成大错。
担任评述嘅史高斯破口大骂：「我都唔知佢做紧乜，简直荒谬，呢种到底系技术，定系娱乐表演呢，我觉得似小丑。」
镜头影到曼联领队坦哈格黑晒面，半场休息後，立即用拉舒福特入替安东尼马菲奥斯，以作惩戒，「福仔」上阵後顶入1球。
安东尼马菲奥斯上月曾经做出「田鸡式假动作」，被批评太花巧，但佢声称由细到大都系咁踢波，并冇问题，喜欢娱乐球迷，会继续咁踢，但依家澈嬲咗坦哈格，睇怕以後都要收歛一下。
