今届世界盃决赛周又缺少1位球星，根据西班牙《阿斯报》爆料，曼联门将迪基亚落选西班牙国家队55人初步名单，意味将无缘今届世界盃。最讽刺系从未为西班牙上阵嘅基达菲29岁门将大衞苏利亚却榜上有名，难怪球迷纷纷为迪基亚抱不平，闹爆西班牙主帅安历基有眼无珠。
据悉安历基今次初步拣选咗5位门将，包括3位常客，效力毕尔包嘅乌尼西蒙、白礼顿门将罗拔山齐士、宾福特门将大衞拉耶。
至於近期重获车路士正选门将位置嘅阿列沙巴拿加以及名不经传嘅基达菲门将大衞苏利亚都有份，偏偏名气最大嘅迪基亚落选。
迪基亚可以话系曼联近2年表现最出色球员，特别系上季多次拯救球队，唔少球迷认为如果冇迪基亚把关，曼联上季可能已经降班，纷纷为佢无缘世界盃，感到不值。
不过，迪基亚今次落选有迹可寻，因为安历基近年以「战术原因」一直冷落呢位31岁钢门，佢对上一次入选国家队名单已经系上年11月，问题系今次55人初步名单，宁愿拣大衞苏利亚，都唔拣迪基亚，难免令人质疑安历基做得太绝。恐怕只要安历基仍然担任西班牙主帅，迪基亚嘅国际赛生涯都冇得翻身。
值得一提，近年被安历基打入冷宫嘅巴黎圣日耳门中坚沙治奥拉莫斯有份入选55人名单，真系同人唔同命。
安历基将於11月11日公布最终26人大军名单出战今届世界盃，阿列沙巴拿加、大衞苏利亚即使入选今次55人初步名单，但最後可能会被放弃。
