周六(29日)法甲联赛，巴黎圣日耳门(PSG)主场4比3击败特鲁瓦，呢场比赛双方斗攻娱乐性十足，巴西球星尼马交出1入波1助攻最抢镜，佢喺下半场更有一次超精彩「自转交波」，若非基利安麦巴比单刀射失，尼马呢球好可能会系「全年最佳助攻」。
PSG今场3分钟被巴尔迪攻陷先落後，卡路士苏拿24分钟接应尼马妙传追平。巴尔迪52分钟再次为特鲁瓦领先，但3分钟後美斯闪电追成2比2，尼马喺62分钟入楔轰入，基利安麦巴比77分钟射入12码拉开到4比2，特鲁瓦完场前2分钟追番1球，PSG仍然赢4比3。
曼联球星安东尼马菲奥斯嘅「自转720」近期成为热话，作为「大师兄」嘅尼马今场就有接近完美嘅示范，佢下半场一次中场拎波後，高速向前推进杀入人堆当中，喺4个敌衞包围下施展「施丹转身」并用後脚交畀空晒嘅基利安麦巴比，可惜後者单刀射门被救出，浪费尼马呢次「世纪助攻」。
