曼联球星C朗喺早前英超对热刺，因为拒绝後备上阵兼提早离场，被会方罚内部停赛及唔可以同一队操练，但呢位37岁葡萄牙国脚经过周二(25日)同领队坦哈格会面之後，双方似乎已经解决分歧，C朗亦重返一队操队，有望出战周五(28日)凌晨欧霸盃主场对舒列夫。
据悉坦哈格曾要求C朗就事件道歉，并承诺会遵守球会定下嘅纪律，先至容许佢再次上阵，甚至可能倾到冬季转会问题。
虽然外界并唔知道双方会议详细对话，但从C朗可以重新跟随大队操练，而且全程笑容满面，相信矛盾已经解决，C朗仲剪咗新发型，似乎想表达要重新出发。
事实上，坦哈格早前曾经表示，C朗仍然系球队重要一部份，可以继续为曼联作出贡献，预料今次「解冻」之後，C朗好快可以上阵。
