曼联今季进入重建，新帅坦哈格上任短时间就交到货，尤其系对住顶级球员嘅表现。开季只系踢咗11轮，曼联已经完成首循环「Big 6」嘅对碰，5场大战拎到3胜1和1负成绩，拎到嘅分数已经差唔多同上季对「Big 6」嘅总分睇齐。
曼联除咗作客输畀曼城外，今场作客车路士成功抢走1分，加上喺主场连赢利物浦、阿仙奴同热刺，5场「Big 6」对决已拎到10分。上季曼联喺10场「Big 6」对碰入面，只有3胜2和5负嘅11分，今季成绩有飞跃进步。
「红魔鬼」咁快踢晒硬仗，意味嚟紧赛程相对容易，佢哋2022年剩低嘅5场联赛，对手全部都排喺联赛中下游，包括韦斯咸(第14位)、阿士东维拉(第17位)、富咸(第9位)、诺定咸森林(第19位)同狼队(第18位)，「易食指数」爆晒灯。
