星期一(17日)哥伦比亚顶级联赛，发生离奇兼香艳嘅一幕，一名圣达菲球员喺排人墙期间，公开拉开条波裤露出下体，疑似想令主射罚球者分心，事件引起球迷热烈讨论，而涉嫌「露体狂」球员就解释自己只系无心之失。
呢场查古里斯科尔多瓦对圣达菲嘅赛事，比赛期间主队获得罚球，圣达菲球员排人墙期间，31岁中坚谢臣佩尼亚突然扯开波裤，将下体完全暴露出嚟，球迷认为佢系故意「露鸟」影响对手，结果负责主射嘅球员亦射唔入，不过圣达菲呢场波最终都输1比2。
谢臣佩尼亚呢个举动成为热话，唔少球迷要求足总同圣达菲向佢作出处分，而当时球证因为睇唔到事件，亦冇作出任何行动，不过谢臣佩尼亚事後解释：「我只系整理自己条波裤，完全冇意图要露出下体，亦都唔知个电视镜头会影住我。」目前足总同圣达菲都未有任何纪律行动。
