世界盃决赛周逼近，各队会喺周五(21日)提交35人至55人嘅初选名单，虽然呢个名单唔会公开，不过英国传媒爆料，指英格兰领队修夫基嘅55人大军中有唔少意外人选，当中包括从未为国家队上阵嘅水晶宫中场伊比尔治伊斯。
英格兰目前有唔少伤兵，今次初选名单就有多位「边缘球星」入围，英国《太阳报》指，罗夫度斯卓克、赫臣奥杜尔、云比沙卡、基斯史摩宁、哈维艾利洛、赖恩施斯隆等冷门人选都有机会入围，而《每日邮报》更率先爆料，未曾为英格兰上阵过嘅伊比尔治伊斯已肯定上榜。
24岁嘅伊比尔治伊斯一向受到修夫基赏识，上年欧国盃决赛周，佢亦入围英格兰33人初选名单，只不过最後因为韧带重伤而未能参赛，今季佢喺水晶宫表现回复水准，有机会争大军一席位。据报英格兰会喺11月10日公布最後26人名单。
