车路士正式宣布，中场尼高路简迪已经接受腿筋手术，预计将会缺阵4个月，意味肯定无法为法国出战今届世界盃决赛周，上届冠军法国衞冕之路难行。
31岁嘅尼高路简迪自从8月中为车路士上阵对热刺之後，一直因伤缺阵，近期已经多次传出佢无缘今届世界盃，车路士依家终於确认呢位防守中场要抖4个月，比外界盛传嘅2个月更加严重。
法国国家队主帅迪甘斯承认缺少尼高路简迪，球队实力受削：「冇咗简迪，国家队实力肯定受影响，佢嘅经验及能力对球队非常重要，简迪近2季都受伤患问题困扰，特别系肌肉问题，我为佢感到难过，佢亦好失望。」
除咗尼高路简迪之外，另1位协助法国夺得上届世界盃冠军嘅中场主力保罗普巴亦正在养伤，仍未确定能否赶及出战今届世界盃。
值得一提，过去5支世界盃衞冕球队有4支分组赛出局，包括2002年嘅法国，相隔20年，法国受到伤兵问题打击，莫非历史又会重演？
