利物浦持续复苏，继上仗1比0击败曼城後，周四(20日)凌晨英超快车再喺主场1比0赢韦斯咸，达云纽尼斯一箭定江山吐气扬眉，不过真正功臣其实在中坚华基尔云迪积克(VVD)，佢被影到喺韦斯咸获判12码前，走去踩烂12码点草皮，结果查洛保云操刀宴客，利物浦得以保住胜果。
利物浦今场改踢4-4-2，上场表现败家嘅达云纽尼斯大踢争气波，早段多番埋门都好有威胁，22分钟更接应森美卡斯左路传中头槌顶入。韦斯咸反击亦唔可以睇小，完半场前查洛保云被祖高美斯禁区内撞跌，球证睇VAR後判罚12码，但查洛保云主射被艾利臣比加救出，下半场两队再冇入波，利物浦得以1比0小胜。
有球迷发现12码事件前，VVD趁住球证去场边睇电视，已静静行去12码点位置，用脚踭「摔」草皮，最後亦成功影响查洛保云射门质素。其实VVD呢个做法系违规，上季阿仙奴中坚加比尔马加希斯同车路士中坚鲁迪格，都因为相同行为被罚黄牌，鲁迪格嗰次更加系对利物浦嗰阵「出术」，估唔到VVD咁快就学识。
