曼联会喺周四(20日)凌晨英超主场对热刺，焦点人物系中场基斯甸艾历臣，呢位丹麦国脚今夏「背叛」热刺加盟曼联，即时成为热刺球迷公敌，不过今场倒戈战就因病未必能够上阵。热刺领队干地赛前就唔肯证实夏天有冇向艾历臣提出邀请，唔认争输畀曼联。
艾历臣曾经效力热刺7年，期间更曾承诺「唔会效力热刺以外英超球队」，今夏落实转投曼联後，有球迷拍片焚烧艾历臣嘅热刺波衫，以示对佢违背承诺嘅不满。但热刺球迷今场未必见到艾历臣，事关佢早前因病缺阵，曼联领队坦哈格赛前表示：「我唔肯定佢赶唔赶得切复出，我当然想佢候命，佢对曼联好重要。」
干地同艾历臣曾经喺国际米兰共事，赛前佢被问到夏天系咪争艾历臣输畀曼联，佢就回应：「我好享受同艾历臣合作，亦希望有机会再训练佢，热刺有冇出手(斟介)并唔重要，佢为自己作出一个重大选择(加盟曼联)，我会祝福佢有好表现，除咗对热刺嘅赛事。」
