巴塞隆拿今季按照沙维意思组军，想买边个就边个，点知钱就使咗，但就交唔到成绩，欧联濒临出局，国家打吡又输畀皇马，西班牙传媒报道，巴塞又想炒教练，近日放风搵人顶替，至少有两个人选。
巴塞近年频频换帅，华尔维迪教得好地地又唔锺意，改搵史坦恩接手，但教咗半年又炒，喺荷兰挖朗奴高文过档，但一年多啲又炒，去年11月请来沙维，以为终於都安定落嚟，专心重建，但球队稍遇挫折，会方又想换人。
报道指，巴塞正考察新帅人选，首选系46岁阿根廷教练加拉度，佢球员时代系阿根廷国脚，踢过巴黎圣日耳门，14年开始执教河床至今，佢同河床已届约满，巴塞准备搵佢顶替沙维。
另一人选大家都好熟悉，就系刚被车路士炒鱿嘅杜曹，杜Sir有欧联夺冠经验，教车路士亦教得好，早前被炒变自由身，系巴塞下任主帅理想人选。
