阿仙奴周日(16日)英超作客1比0赢列斯联，以10战9胜成绩排喺榜首，而且带开曼城同热刺4分，英超对上4次有球队喺头10战9胜，全部都顺利捧走联赛冠军，「兵工厂」今季真系有运行？曼联名宿加利尼维利就批死阿仙奴会「爆煲」，最後都会落番去同曼联、纽卡素等竞争。
阿仙奴今场作客列斯联陷於苦战，虽然布卡约沙卡上半场窄位劲射领先，但佢哋面对主队强力逼抢只能够捱打，若非列斯联前锋班福特下半场12码宴客，阿仙奴都冇咁易赢波。阿仙奴依家10战9胜1负，系继纽卡素(95/96)、车路士(05/06)、曼城(11/12)、利物浦(19/20)、曼城(17/18)後，第6次出现开季10战9胜嘅情况，而对上4次做到嘅球队全部都系最後冠军。
对於阿仙奴嘅夺标机会，加利仔就话：「我仍然觉得曼城可以轻松捧盃，曼城喺晏菲路输波会系佢哋全季最难踢一仗，所以情况冇乜改变，阿仙奴最後会落番去同热刺、曼联、车路士、纽卡素嗰啲球队竞争。」
