利物浦喺英超大战击败曼城，不过伤兵问题再度加剧，迪亚高祖达喺最後补时阶段怀疑肌肉受伤，要由担架床抬离球场，万一佢要长时间养伤，利物浦就要焗用「水货」达云纽尼斯，呢位乌拉圭前锋今场後备上阵疯狂失机，其中一次3打1进攻竟然「自私射」，唔少利迷都话唔想见到佢踢正选。
迪亚高祖达今仗满场飞，去到补时阶段突然按住右脚表情痛苦，最後仲要瞓担架出场，领队高普赛後表示忧心：「希望我唔使讲太多关於佢嘅伤势，踢咗96分钟之後，佢感觉肌肉有唔妥，当你见到迪亚高祖达瞓低，就知道大事不妙。」
利物浦已经有路尔斯戴亚斯养伤，如果迪亚高祖达都伤埋，达云纽尼斯好可能要担大旗，但佢今场後备上阵表现极差，3次射门都唔中龙，其中一次3打1快攻，佢唔交波畀中间完全冇人看管嘅穆罕默德沙拿，自己喺窄位夹硬射门失机，好在利物浦最终都保住胜局，但大批网民就留言狂插达云纽尼斯系终极「水货」。
