曼联连胜断缆！「红魔鬼」周日（16日）晚英超於奥脱福球场出击，但只能同纽卡素互交白券，各项赛事3连胜後遭闷和，传奇领队费格逊入场睇波又做黑脚。
今场系曼联门将迪基亚第500次为球队上阵，加上C朗早前射入球会级赛事700个入球，「红魔鬼」安排传奇教头费格逊颁奖畀佢哋。费Sir见到「囝囝」C朗不知几开心，仲即刻揽住佢，现任领队坦哈格亦好识做，今场畀C朗打正选，拉舒福特退居後备。
不过今场踢落曼联同纽卡素都只系均势，论入肉程度，纽卡素嘅攻门更具威胁。23分钟「喜鹊」捷比亚主射罚球省中人墙，佢立即逗入禁区，祖连顿头槌攻门先中楣弹出，佢再补多一头，点知又中柱，未能变成入球，非常可惜。曼联较似样嘅攻门喺37分钟出现，安东尼马菲奥斯左路小禁区快射，可惜被对方门将尼克普比接实，双方半场互交白券。
下半场开波无耐，C朗曾经2次送个波入网，第1次被判越位在先，第2次系纽卡素後场有个罚球，「喜鹊」球员轻力踢畀门将尼克普比示意佢开波，但C朗认为对方已开出罚球，抢走皮球并射入网，但球证表示入波无效之余，仲畀咗面黄牌C朗。
C朗无建树之下，70分钟被换走，由拉舒福特顶替。福仔喺88分钟曾经突破越位，交波畀费特，可惜起脚射斜，之後喺补时4分钟到福仔自己有机会，点知佢门前7码头槌攻门竟然唔中龙，双方最终踢成0比0。
车路士赠维拉2蛋
至於同时间开波嘅车路士作客阿士东维拉，凭美臣蒙特上、下半场各入1粒，以2比0赢波，继续紧守联赛第4位。
