英超劲旅车路士周日(16日)证实，英格兰右闸列斯占士因膝部韧带受伤，将会缺席未来8个星期赛事，即系话世界盃淘汰赛前都唔能够上阵，除非佢可以奇迹提前康复，否则英格兰徵召佢踢世盃机会极微。据报英格兰足总对事件非常愤怒，认为车路士治疗失当。
列斯占士喺上周中欧联对AC米兰受伤，但车路士竟然容许佢留喺米兰玩多1日，并喺冇任何医疗辅助下，第2日先至坐廉航飞返英国，结果发现膝部韧带伤势加剧，预计未来8个星期都唔可以上阵，虽然暂时决定唔做手术，以增加佢提前复出嘅机会，但情况绝不乐观。
22岁嘅列斯占士今季状态大勇，被视为英格兰国家队右闸必然正选，佢嘅受伤对国家队打击极大，尤其另外2名右闸基尔获加同阿历山大阿诺特都受伤，领队修夫基依家只剩捷比亚一个常规右闸，阿仙奴嘅宾韦特就系热门替补人选。
