万众瞩目嘅英超「红蓝对决」，利物浦主场1比0打破曼城不败身，备受注目嘅曼城前锋艾宁夏兰特，赛前喺9场联赛狂入15球，不过今仗面对英超最强中坚华基尔云迪积克(VVD)就冇啖好食，继社区盾後再次食白果。VVD今场完美封杀「布欧」之外，更延续佢喺晏菲路踢英超从未输波嘅神级纪录！
利物浦今场用VVD搭住祖高美斯做中坚，2人今季表现都受到质疑，不过今场对住夏兰特就踢出极高水平，VVD有7次解围、3次争抢成功，包括下半场喺龙门口快夏兰特一步头槌救险。夏兰特自加盟曼城後，踢14场比赛有12场都有入波或助攻，仅有2场交出白卷，就系社区盾同埋今仗面对VVD。
自2017年12月加盟利物浦後，VVD接近5年「红军」生涯，原来从未试过喺晏菲路进行嘅英超输波，佢有份踢嘅69场联赛主场赛事，有58胜11和嘅神级数据，之前嘅纪录保持者已经系1992年嘅曼联球星沙柏，佢喺奥脱福嘅英超不败纪录只系59场。
VVD赛後表示：「我哋用生命去防守，呢个亦系每一场比赛需要做嘅事，今场面对曼城，只要有1%失误就会受到惩罚，但我哋做得非常之好，好开心可以保持不失球，依家要专注下一场比赛。」利物浦周四(20日)凌晨会主场对韦斯咸，VVD有望继续改写不败纪录。
