干地成为热刺领队之後，除咗签入李察利臣等球星之外，亦不忘提拔小将，21岁翼锋拜恩基尔成为干地嘅「新契仔」，呢位西班牙国脚上仗欧联後备上阵5分钟，凭个人突破，博到12码，表现抢眼，被球迷捧为「新巴利」。
拜恩基尔上年夏天由西维尔加盟热刺，但仅过半季就被外借去华伦西亚，今季返回热刺之後，仲未喺英超上阵。呢位新星今季仅有2次上阵，都系欧联对法兰克福，包括上仗等到85分钟後备上阵，把握机会博到12码，可惜哈利卡尼主射宴客，白白浪费拜恩基尔一番心机。
身穿11号球衣嘅拜恩基尔一战成名，获球迷及网民激赞，认为佢有加里夫巴利初出道时期嘅影子。
值得一提，加里夫巴利效力热刺全盛时期，都系着11号，加上拜恩基尔同巴利一样咁扭得，难怪热刺球迷对佢特别有亲切感。
由於李察利臣有轻伤在身，未必可以喺周日(16日)凌晨英超对爱华顿踢足全场，届时拜恩基尔有望後备上阵，再骚哥利。
