曼联上季英超作客爱华顿输波後，C朗拿度打爆小球迷手机一事余波未了，英格兰足总上星期检控C朗行为不检/暴力行为。曼联领队坦哈格周三(12日)喺记者会入面，言之凿凿话C朗「唔会接受」今次指控，点知转头爆出C朗原来已经「认罪」，唔通佢同坦哈格作对？
据英国传媒报道，C朗已经就足总今次检控认罪，不过佢就会据理力争，坚持唔应该受到停赛处分，《曼彻斯特晚报》消息指，坦哈格嘅「相反答案」系出於沟通问题，佢嘅「唔会接受」意思系指「唔会接受停赛」，强调曼联会全力帮C朗求情。
打爆手机事件发生後，C朗亦曾公开道歉，并且邀请「受害」嘅14岁小球迷去奥脱福球场睇波，不过小球迷嘅妈妈仍然好嬲，早前公开炮轰C朗为人傲慢，所谓道歉亦冇诚意。
